壹週刊_七老八十飆車黨

 壹週刊 | 1187期 | P34 坦白講 | 2012-12-06

 

七老八十飆車黨

 

 

撰文：葉天佑

攝影：廖雁雄

 

「當你八十歲，你還有多少尋夢的勇氣？」年近八旬的台灣夫妻張弘道和陳映美，卻偏偏勇字當頭，不顧體能、少理安全，踏行油做鐵騎士。他們和另外十五位老人家揸電單車環島遊，全程被拍成紀錄片。台灣上畫七星期，票房累積三百四十萬港元，成為寶島最賣座嘅本土紀錄片，影片將在本月於香港公映。

 

我叫張陳映美，今年七十七歲，騎士團中唯一女將。我患過乳癌同胃癌。好番之後成個人醒晒，知道自己都唔擺得幾耐，應該趁未死前完成夢想。○七年我見到老人院舉辦環島電單車團，我同老公喺台灣生活咁耐，都未試過走勻成個台灣，於是我哋即刻報名。

 

我同老公張弘道今年啱啱好結婚五十年，有三個仔女十個孫，啲後生都好支持，而我哋就當係第二次度蜜月。

我叫張弘道，今年七十六歲，退休之後我做牧師。參加環島團係希望一圓遊台灣美麗之島嘅夢想，仲可以關懷其他老人家。成團十七人，我同太太呢對「七十後」，只七張幾，最年輕，團友平均八十一歲，但都係老頑童，個個都精靈活躍。

 

出發之前，我哋要做身體檢查，仲要受訓兩個月，日日做掌上壓。全團十七人，有四個要戴助聽器、五個有高血壓同心臟病。環島十三日，我哋要挑戰一千一百七十八公里嘅旅程，由台中出發，經過台南、高雄、台東、台北再回到台中。

 

環島十幾日，雖然我哋自以為意志同幹勁都好似返番去十八歲，但係副偈始終都七老八十，要長時間揸電單車真係唔易頂，所以我哋每三、四個鐘就要休息，做吓伸展運動。試過有一次，食飽飯大家再上路，就有個隊友揸揸吓瞓着咗然後人仰馬翻，好彩佢仲識笑笑口話：「無辦法，平時慣咗下晝食飽要眠一眠。」每晚臨瞓前，隨團護士都同我哋做檢查，量吓血壓，問我哋有冇胃口，身體有冇邊度唔妥，驚我哋水土不服要入廠。

 

環島除咗實現自己夢想，仲希望將份幹勁帶俾其他老人家，我哋每晚會去探訪老人院，其中一次，有一位坐輪椅嘅伯伯，知道我哋挑戰環島遊，眼紅紅泛淚光，千言萬語但卡在喉嚨說不出來，只激動地狂舉起大拇指讚好，我哋嘅故事似乎真係可以感動人。

 

路程中最危險就係蘇花公路時，車路超窄，路上又有大巴、大卡車等喺我哋旁邊左右穿插，加上又遇上大風大雨，後來聽到有救護車嘅聲音，知道有團友出事。心情即刻好沉重，原來死亡離自己咁近，心裡面不斷祈禱，好彩團友只係跌倒，無生命危險。

 

有驚無險完成呢次旅程，意想唔到電影公司拍咗套紀錄片。冇靚仔靚女明星，都有咁多人入場支持呢套戲，今個月仲會賣埠到香港。我哋想證明俾社會睇，老人家仲好有活力，可以去尋夢。